|
As normas
do proxecto témporas están baseadas nas Normas do Instituto
Nacional de Meteoroloxía e nas normas do Global Phenological Monitoring
(GPM) pero con certas variacións, xa que, nin son sempre as mesmas
especies, nin estamos a medir o mesmo sinal. Ademais témporas pretende
ir máis alá, formulando unha serie de actividades paralelas
á medición do sinal.
Nas fichas
específicas, aparece máis pormenorizado tanto a forma de
medir o sinal como as actividades complementarias.
Normas
Ler concienzudamente as normas antes de facer calquera medida ou anotación
Débese
sinalar un día fixo no que se verificou o sinal que estamos a medir.
Aínda que as observacións se realicen unha vez cada semana.
Unicamente
se cubrirán os formularios específicos cando se observe
algún sinal, se non se detecta o sinal ou a especie non está
presente na zona, non se cobren. Soamente se enviarán os formularios
ó coordinador unha vez rematado o ciclo que estamos a medir. Por
exemplo, cando remata a floración do salgueiro, se o sinal é
a floración, ou a data de migración das rulas, cando xa
non vemos ningunha rula. Para facilitar o labor do coordinador recoméndase
mandar conxuntos de formularios de distintos sinais.
Se o observador
se ausenta do lugar durante algún tempo, deberá buscar un
substituto, previamente ensinado na práctica da observación.
As observacións
deben referirse como máximo a un entorno de 5 km da localidade
indicada, sempre que non haxa diferencias xeográficas ou ecolóxicas
notables. Por exemplo: en Pobra de Trives, nun radio de 5km, pasamos de
280 m de altura a 1800 m. Neste caso as variacións son tan bruscas
que non poden ser homoxéneas, polo que convén limitar as
observacións ó entorno da vila. De tódolos xeitos
cada centro pode valorar estes gradientes (que son de gran interese) establecendo
dentro da zona estacións independentes.
Deben buscarse
lugares de observación normais nos que as plantas e animais se
desenvolvan en condicións tamén normais. Non debemos seleccionar
plantas que vivan nas hortas, pois poden verse beneficiadas por determinadas
actuacións humanas. Como estación normal considérase,
se estamos a traballar p.ex. co carballo, o centro dunha carballeira que
non sufrira nos últimos tempos incendios podas ou talas.
As observacións
se basearán en alomenos tres exemplares do mesmo lugar e doutros
lugares con condicións similares co fin de homoxenizar a mostra
e limitar ó máximo a marxe de erro. No caso das árbores
deberán ser os mesmos individuos tódolos anos (debedes marcalos
dalgún xeito), e escoller as pólas que estean orientadas ó
sur.
As observacións
sobre matorrais (toxo, xesta) deben facerse en sitios abertos e, a poder
ser, que non posúan moita pendente, para que non resulten favorecidos
ou perxudicados por diferencias de insolación ou profundidade do
solo. Rexeitaremos, asi mesmo, os matos que sufriran lumes nos últimos
anos, e os que se asentan nos taludes das estradas ou desmontes.
Sempre se
escollerán plantas vigorosas que leven tempo no lugar. Escolleremos
aquelas que estén máis afastadas das casas e dos muros.
Se estamos a traballar cunha especie da que temos soamente un individuo,
como por exemplo unha árbore, sinalaremos a data de aparición
do sinal cando se faga visible polo menos na terceira parte da planta.
Se estamos
a traballar cun conxunto de plantas, deberá sinalarse a data na
que aparece o sinal alomenos na metade dos individuos que constitúe
o conxunto.
|
